گوره سن هوری لر نارین گوللو چیت تومان گئییرلر، یوخسا ساپورت تومان! (آئین شائین)

جمعه بیست و ششم مهر 1392, 21:19 | نويسنده : محمدعلی ارجمندی

سیرالاما : طنز ـ آیین شایین

آیین شایین ـ 25

گؤ

گوره سن هوری لر نارین گوللو چیت تومان گئییرلر، یوخسا ساپورت تومان!

محمدعلی ارجمندی

یادیما گله نی هر زامان تلویزیونو آچمیشام اخبار دئین آپاریجی لار، قاشلارین آتیب توتاراق صندل اوسته بورولوب، گردن چکیب فخر ایله دئییب لر: برای نخستین بار در خاورمیانه این طرح، شرکت، محصول و ... در کشورمان تولید شده و انحصار جهانی را شکسته ایم.

سونرا دا بیر «ها هااا، ها ها ها ـ آ آاا آ آ آ» موزیک یاییلیب، فخریدن گؤزلریم سویا دولوب سئوینجه ییمدن آز قالیر  آتیلیب یاپیشام تاوان دان «سقف» آسیلی اولان لوستره!

بیری یوخدور دئیه آی کیشی جاماعاتین حیسسییاتیندان بیر بئله اوینامایین، هله بیزیم آروادلارین اوتدوغو قره چادرالار جومونگ اؤلکه سی «کره» دن گلیر. ووردو صاباح ـ بیریسی گون بو «مشکی» پارچانی دا تحریم ائتدیلر، دئمه لی بو سفر عذابی شدید اولموش ایرضا خاندان سونرا ایت ـ پیشیک اَتی یئین جومونگ نوه لری، خان ننه لریمیزی کشف ـ ی حیجاب ائده جک.

توبه استغفراا...

منیم کی جوت خان ننه م آللاهین ایرحمتینه گئدیب دونیاسین دئییشیبلر. آما سانکی قورخورام ائله او دونیادان دا بیله می قارغیش ائدیب دئیه لر: ننه جانی سن نه قدر غیرتسیز اولوب بو ظولما گؤز یومورسان!

سیزلرده اؤزگه دئییل سیز ائله گاهدان دا گئجه لری یوخودا بیله می قره باسیر! خان ننه م گلیب بیله مه حده ـ قورخو وئریب دئییر: تووو گلسین غیرتیین بااا!

به بو قیزلار نییه هامیسی حاجی لئیله یه تای اولوب، ساپورت تومان گئییرلر!؟ نییه به بونلارا گؤره بیر کاغاز یازمیرسان؟

ـ ویییی، سن بونلاری هاردان بیلیرسن خان ننه، اولمایا جنتده کی هوری لرده بو تومانلاردان گئییب دولانیرلار، یانی ائله اوردادا آدلاری ساپورت دور؟!

ـ یوخ بالاسی، جنتده کی هورولاردا ائله بیزه تای نارین گوللو چیت تومان گئییرلر.

- بس اوندا جهنم هوری لری هانسی تومانلاردان گئییرلر خان ننه؟!

- وییی دیلین آغزیندا شیشسین جهنمدن منیم نه خبریم اولاجاق کی، بهشت اهلی بو سایاق گئیینیر. جهنمین هاواسی ایستی دی یقین اوردا باشقا تهر تومانلار وار!

بیرده سن دئییرسن بلکه بیز الیمیزی بو دونیادان اوزموشوک داها هئچ ندن خبریمیز یوخ. ایروفوم همه شه سنین باشین اوسته. جوما آخشاملاری گاهدان خیاما ساری دا گلیب باش چکیرم، او گون آخشام چاغی، کیم ایله بیرگه ایله شیب نار سویو ایچیردین هن؟!

ـ خان ننه سنی آند وئریرم آللاها، سئوگیلین مَشد امرعلی احترامینا آز منی خافلاندیر. گلیسن گونوزلری گل، گؤزل ـ گؤیچک ایله شیب دانیشاقدا به نییه گودورسن من باشیمی یاستیغا قویوب یاتاندان سونرا گلن یوخوما!

آنجاق، خان ننه مه سؤز وئریب سؤزون یئره سالماماق اوچون ده اولموش اولسادا بو گون یئری گلمیشکن ساپورت تومان گئینلره گؤره بیر بالاجا کاغاز یازماق ایسته ییرم.

آ کیشی، ایش او یئره چاتیب «فرانس 24»  تای اجنَوی بیر تئله کانال بیزیم قادینلارین ساپورت تومانلارینا گؤره سندلی فیلم چکیب دئییر: ایران آدلی اؤلکه ده، قادینلار ساپورت آدلی تومانلار ایله مدنی اعتراض یاپیرلار!

یالانچا دیلین آغزیندا شیشسین، بیزیم قادینلارین نه کاری وار بئلنچی ایشلر ایله! ساده جه مد اولاراق مد بازلیق ائدیرلر، اونودا گؤزو باغلی. گؤر بیر گشت ـ ی ایرشادی گئنه سالا بیلرسیز جاماعاتین جانینا!

کیم نه دئییر قوی دئسین. منجه کیشی لی ـ آروادلی بو جاماعاتین یاریسی دلی دیر، یاریسی دلی باز!

سؤزون ممَدقولوسو، بیزیم توپلوم یوخاری سئویه ده روحسال خسته دیر و داورانیشلاریمیزدا چوخ راحات بونون ایزین تاپیب گؤرمک اولار.

اؤرنک اولاراق بو گونلر فیکیر وئرسز، آریقلی ـ کؤکلو، یاراشا ـ یاراشمایا هامی ساپورت تومان گئییر. دا دئین یوخدور آخی بوی ـ بوخونا قوربان اولوم، اسکلت جانا ساپورت تومان یاراشماز کی ، اؤزونو آداما اوخشادمادان خان ننه م دئمیشکن حاجی لئی له یه بنزدیرسن. یا ائله بونون ترسه سینه سوتدن یانمیش کؤک آداملار!

هر حالدا فارسلار بیزدن مثل اوغورلاییب دئمیشکن: «تو رو سنه نه» منه ربطی اولان دئییل دوز دئییرسیز، منیم نه کاریم وار لاب بئله صاباحدان «بوت»1 گئیین، گؤز گؤزللییی سئور! آنجاق خان ننه ـ م منی داها بوندان آرتیق قارقیش ائدیب، یون یورقانیم اوستوندن سیریخ چکمه سین دئیه قیساجا بیر آچیق مکتوب یازدیم. والسلام ـ شد تمام.

1 ـ اوزون بوغازلی چَکمه

 http://www.google.de/imgres?start=367&sa=X&biw=1525&bih=677&tbm=isch&tbnid=L1rAXcIaaEFEXM:&imgrefurl=http://ayinshayin.blogfa.com/&docid=zNsA-FwjbLj9uM&imgurl=http://axgig.com/images/72143578803620551365.jpg&w=1153&h=1197&ei=zj9kUq3wLsaEtAbAlIDgCg&zoom=1&iact=hc&vpx=83&vpy=22&dur=11758&hovh=229&hovw=220&tx=121&ty=164&page=11&tbnh=142&tbnw=152&ndsp=32&ved=1t:429,r:76,s:300,i:232