قیرمیز بویالی سیمگه، بیرلیک اؤزللیکلری ایله دولودور – علیرضا فرشیهئچ کیم بوتون تشکیلاتلار دستکلهییب دئمه ییبدیر و ان آزی گاموت بو سیمگه نی و اؤز سیمگه لریندن سووای هئچ باشقا سیمگهنی دستکلهمهییب، دستکلهمه یه جک! یانلیشلیغا کیم قرار وئره جکدیر: حضرت آیت الله العظمی مهران بهاری!!! سن الله بئله داورانمایین و سایقیلی اولون.
قیرمیز بویالی سیمگه، بیرلیک اؤزللیکلری ایله دولودور – علیرضا فرشی
چهارشنبه ۲٨ مهر ۱٣٨۹ - ۲۰ اکتبر ۲۰۱۰
من:
مهران بی! بو سؤزلری یالنیز سنه جاواب یازمیشام دئیه، مندن اینجیمه! بو سؤزلری سنین کیمی دوشوننلره یازماغیم گرکیردیر. بیر آزا محکم و ایتی سؤزلر دئدیغیما گؤره ده «بو دا بونون طرزیدیر» دئیه، اینجیمکدن واز کئچین. سنین یازیوی و دوغروسو سیزین یازینیزی (سنین کیمی دوشوننلرین یازیسینی) اوخودوم. ایکی باشقا آچیدان دونیایا و آذربایجانا باخان گؤروش واردیر و بو گؤروشلر دانیلمازدیلار. من سنین گؤروش آچیوا سایقیلی داورانمالییام و البته سن ده منه! من شفافیتدن و آچیق دانیشیقدان یانایام و ابهاملی دانیشانلاردان، ایکی اوزلولردن، نئچه اوزلولردن، مین اوزلولردن، و ... آجیقلانیرم، داها دوغروسو زهلم گئدیر! آما، سنین کیمی آچیق گؤنوللو و آچیق سؤزلو اینسانلاری سئویرم. دوزدور کی سنی تانیمیرام، و تاخما آدیوین ندن سئچدیگینی، هارادا یاشادیغیوی، و ... بیلمیرم و بیلمه یی ده حاققیم بیلیرم، آنجاق، سن گیزلی قالماقدا ایصرارلیسانسا اولسون! آنجاق، وورقولاماق ایستهییرم کی گیزلیلر و تاخما آدلیلار سییاستی، و البته میللتی یؤنلده بیلمزلر. فاسلارین گیزلیلری ده واردیر، ائشیکده یاشایان آچیق سؤزلولری ده، ایچریده یاشایان آچیق سؤزلولری ده. آنجاق، بیلمیرم ندنسه آذربایجانچیلارین سعید متینپورو، عباس لئیسانلیسی، ابراهیم رشیدیسی، و ... آزدیر و ایچریده آچیقجاسینا دانیشیب، هزینه وئرمه یه راضی اولمایانلارین ساییسی میللی حرکتچیلرین یوزده یوزدن ائپسیلون قدر آزینی تشکیل ائدیر. یازیقلار اولسون کی ائشیکده چالیشانلاریمیزین دا دورومو بئله دیر و تاخما آدلارین دالیسیندا گیزله نیب، سورومسوزجاسینا داوارنیرلار و هر نه آغزلارینا گلیر دئییب، هئچ بیر میللی منفعته رحم ائتمهدن گروهی و داها دوغروسو گروهکی منفعتلرینی و چوخ واقتلاردا شخصی منفعتلرینی اوستون توتورلار. باشیزی آغریتماییم، و سنین سؤزلریوه تارتیشالیم!
بوتون تشكيلاتلار بو اؤنه‌ريني دسته‌كله‌مه‌ميشدير: اؤنه‌ريله‌ن يئني آل بايراق-سيمگه‌ني دسته‌كله‌يه‌نله‌رد‌ن بير سيراسي، اونون بوتون تشكيلاتلارين دسته‌ييني قازانديغيني ايدديعا ائديرلهر. آنجاق بو ايدديعا گرچه‌كله‌ري يانسيتمير. قيرميزي بايراغي دسته‌كله‌يه‌نله‌رين گرچه‌ك يوزده‌له‌ريني تارتيشماق - ايران`ين دورومونو گؤز اؤنونده آلينجا- گرچه‌كچي دئييلدير. وار اولان تشكيلاتلارين چوخو بو بايراق-سيمگه‌ني منيمسه‌سه ايدي بيله، گينه ده دوروم ده‌ييشمه‌زدي و بو گيريشيمين دوغرو اولدوغونو قانيتلامازدي. يانليش بير دوشونجه و اينانج، هامي طرهفيندهن منيمسه‌نسه بيله، تنقيد ائديلمه‌ليدير.
من:
هئچ کیم بوتون تشکیلاتلار دستکلهییب دئمه ییبدیر و ان آزی گاموت بو سیمگه نی و اؤز سیمگه لریندن سووای هئچ باشقا سیمگهنی دستکلهمهییب، دستکلهمه یه جک! یانلیشلیغا کیم قرار وئره جکدیر: حضرت آیت الله العظمی مهران بهاری!!! سن الله بئله داورانمایین و سایقیلی اولون.
تشکیلاتلاردان بیر سیراسی و شخصیتلریمیزدن بیر سیراسی بو سیمگه نی اونایلاییب، باشقالارینی دا بیرلیک یارانسین دئیه اونایلاماغا چاغیریبلار. سن ندن ناراحاتسان؟! بیرلیگین یارانماسیندا، یوخسا "قیرمیزی بویا سیمگه یانلیشدیر، من دئین دوزدو" سؤزوونو قبول اولماماغیندان. بیر داها وورقولاماق ایسته ییرم مئهران بی! من! علیرضا فرشی! فرزند بهمن، و ... سن کیمسن. بو قیرمیزی بویا سیمگه سینی اؤنریب، اونو بو قیرمیز بویالی بایراق کیمی تقدیم ائدنلرین آدی، سوی آدی، و هانکی تشکیلاتلارا باغلی اولدوغو گون قاباغیندادیر. سن کیمسن؟! ندن مخالیفلرین آدلاری بللی دئییل و تاخما آدلارلا ایمیل قروپلاریندا گزیرلر؟!
مهران:
ميلله‌ت بو اؤنه‌ريني منيمسه‌مه‌ميشدير: آل بايراق-سيمگه‌ني اؤنه‌ره‌نله‌رين ايدديعاسينا قارشين، شو آندا تورك ميلله‌تي كسينليكله سؤز قونوسو اولان بايراغي (نه‌ده آزهربايجان رئسپوبليكاسينين بايراغيني) دسته‌كله‌مه‌ميشدير و بو بايراق تورك ميلله‌تينين اوره‌يينده ده يئر آلمير. بوتون تشكيلاتلار قيرميزي بايراغي منيمسه‌سه‌يدي بيله، گونئي آزهربايجان`ين باشا باشيندا زنگان، باتي آزهربايجان، دوغو آزهربايجان، ارده‌بيل، مركه‌زي، همه‌دان، قزوين اوستانلاري و تئهران، گيلان، كوردوستان و كيرمانشاه اوستانلارينين توركله‌رله مسكون بؤلگه‌له‌رينده خالقين اؤنه‌ملي بير بؤلومو اونو منيمسه‌يينجه‌يه ده‌ك، گينه ده بو بايراغين ميلله‌ت طرهفيندهن منيمسه‌ديييني سؤيله‌مه‌ك اولمازدي. گونئيده و ايراندا آغير بير آسيميلاسييونا اوغراميش تورك خالقي، اويانيش مرحه‌له‌سينده‌دير و بؤيوك بير بؤلومو، اؤزونون بير ميللي قوروب اولدوغو بيلينجينه بيله وارماميشدير. تورك كيتله‌سي ان ياشامسال حاققي اولان توركجه تحصيل حاققي قونوسوندا بيله يئته‌رلي دويارليليغي قازاناماميشدير. آجي گرچه‌ك بودور. تيراختور ياريشمالاريندا قالديريلان قيرميزي بايراقلار، او ياريشمالارا قاتيلانلارلا سينيرليدير و كيتله‌سه‌ل.له‌شمه‌ميشدير. بير سيمگه بايراغي خالقين نئجه باغرينا باسماسيني گؤرمه‌ك اوچون توركييه`ده كورد خالقينين بايراقلارينداكي اوچ رنگه نئجه داورانديغيني گؤزله‌مله‌مه‌ك يارارلي اولار. اورادا سيرادان كورد خالقيندان هر گؤروشده اولان آيدينلارينا، ميلله‌ت مجليسينين كورد نوماينه‌نده‌له‌رينده‌ن نووروز بايرامي قوتلامارينا، فولكلور دانس قوروپلاريندان فوتبال ياريشمالاريندا، خييابان گؤسته‌ريله‌رينده‌ن سيياسي توپلانتيلاردا، .... هر يئرده بو اوچ رنگ واردير. بئله بير دورومدا "خالقيميز قيرميزي سيمگه‌ني باغرينا باسدي" كيمي سؤزله‌ر، گرچه‌كله‌رله ايلگيسيز و يالان ايدديعالاردير. بايراق و قيرميزي بايراق-سيمگه هله‌ليك نه تورك خالقي، نه ده گونئي آزهربايجان اهاليسي طرهفيندهن منيمسه‌نه‌ن بايراق و سمبول دئييلدير.
من:
هارادان بیلیرسیز میللت منیمسه مه ییبدیر! تیراختور اویونلارینا باخساز، شهرداری اویونلارینا باخساز، و حتی بویاسی قیرمیزی اولمایان فولاد اویونلارینا باخساز، ... گؤره جکسینیز کی آل بویانی آذربایجان بویاسی کیمی تقدیم ائدنلر واردیر و بیر آز اینترنتی گزسز، و مقاله لرده، حتی فارسلارین یازدیغی مقاله لره دیققت ائتسز، یوزلرجه «جنبش سرخ آذربایجان»، «پرچم سرخ آذربایجان»، و «سرخها در برابر سبزها» و ... گؤره بیلجکسینیز. بئلنچی یازیلاری باشقا بویالار اوچون (قارا، آغ، گؤی، و ...) گؤرمک اولمور. ائله بونا گؤره ده «آل بویا» (قیزیل بویا، قیرمیزی بویا) آذربایجاندا باشقا بویالاردان چوخ سئویلیر و یایقیندیر. نئجه کی کوردلر ساری بویانی سئویر، و فاسلار یاشیل بویانی. بو بیر گئرچکدیر و اونو دانماق اولماز:
مهران:
بير سيمگه بايراغي خالقين نئجه باغرينا باسماسيني گؤرمه‌ك اوچون توركييه`ده كورد خالقينين بايراقلارينداكي اوچ رنگه نئجه داورانديغيني گؤزله‌مله‌مه‌ك يارارلي اولار. اورادا سيرادان كورد خالقيندان هر گؤروشده اولان آيدينلارينا، ميلله‌ت مجليسينين كورد نوماينه‌نده‌له‌رينده‌ن نووروز بايرامي قوتلامارينا، فولكلور دانس قوروپلاريندان فوتبال ياريشمالاريندا، خييابان گؤسته‌ريله‌رينده‌ن سيياسي توپلانتيلاردا، .... هر يئرده بو اوچ رنگ واردير. بئله بير دورومدا "خالقيميز قيرميزي سيمگه‌ني باغرينا باسدي" كيمي سؤزله‌ر، گرچه‌كله‌رله ايلگيسيز و يالان ايدديعالاردير. بايراق و قيرميزي بايراق-سيمگه هله‌ليك نه تورك خالقي، نه ده گونئي آزهربايجان اهاليسي طرهفيندهن منيمسه‌نه‌ن بايراق و سمبول دئييلدير.
من:
دئموکراسی و حقوق اؤلکه سی تورکیه نی نئجه ایران اؤلکه سی ایله توتوشدوردوغووا شاشیرماق گرکیر!!! بللی کی کوردلرین اولان آزادلیغینین یوزده بیری بیزده اولسایدی، بیز ده چوخ ایشلری گؤریدیک. سن گل ایران کوردلری ایله ایران تورکلرینی توتوشدور و سونرا ادعا ائت. سن ایراندا یاشامیرسان و بللی دیر کی هئچ بورانین دوروموندان خبرین یوخدور. لطفاً، اورانین دیسکولارینی بوراخ، بیر گون گل تیراختور اویونوندا کؤتک یئیندن سونرا گؤر کی قیرمیزی بویانی و آذربایجان بایراغینی سئومک نه دئمکدیر. من بورادا یاشاییرام و سنه دوزونو دئیه بیلرم. آما، سن بورادا یاشاماماغین اوچون، منیم سؤزومون دوز یا یالان اولدوغونو دا اثبات ائده بیلمزسن: گل اؤزون گؤر!
مهران:
ميلله‌ت آدينا قرار وئرمه‌ك، ميلله‌ته ايهانه‌تدير: شوبهه‌سيز گونئي آزهربايجان و تورك خالقي اؤز ميللي بايراغينا قاووشمالي، بو دوغرولتودا تارتيشمالار ياپيلمالي، اؤنه‌ريله‌ر وئريلمه‌لي و بونلاردان بيري و يا بير نئچه‌سينين تركيبي سيياسي تشكيلاتلار آراسيندا ايجماع اولوشورسا و خالق اونو بو و يا هر هانسي باشقا بير نده‌نله دوغرودان يييه‌له‌نيرسه، گونئي آزهربايجان`ي تمثيل ائتمه‌ك اوچون منيمسه‌نمه‌ليدير. آنجاق بو سوره‌ج، بيزده يئنيجه باشلاميشدير. اورتادا هئچ بير شئي يوخكه‌ن و ميلله‌تين روحو بيله هئچ بير شئيده‌ن خبه‌ري اولماديغي حالدا، يئتگيسيزله‌رين ميلله‌ت آدينا قرار وئرمه‌له‌ري، "خالق قيرميزي بايراغي منيمسه دي و باغرينا باسدي" كيمي گرچه‌ك ديشي ايدديعالاردا بولونمالاري و اولايي بيتميش كيمي گؤسته‌رمه‌له‌ري، ميلله‌ته ايهانه‌ت و اينسانلاري آخماق يئرينه قويماقدير.
من: بللی کی خالقین هامیسی میللی مسئله لریمیزله ایلگیلنمیرلر، و بو ندنه کی اونلار ایلگیلنمیرلر بیز ده ایلگیلنمه یک سؤزو خییانتدیر. بیلن آغری چکر، دئیر کی کئشکه ائششک اولاردیم، بیلمزدیم! آما من و سن آغری چکمه یی سئچمیشیک! میللت آدینا قرار وئرمک ایهانت دئییل، نئجه کی، میللی مجلیسلرده گونده میللت آدینا قرار وئریلیر. آنجاق، میللت آدینا هر آدامین قرار وئرمه یی ایهانتدیر و البته میللت ده بئلنچی آداملارین قرارینی قبول ائتمز. میللتین دردینی چکن، اونون میللی ایستکلری اوچون اینجیین، کؤتک یئیه ن، توتساغا دوشن، و ... میللتین آدینا و اونا گووه نیب، قرار وئره بیلر و البته میللت ده بئلنچی آداما آرخالانیر. البته کی میللت دیسکولاردا، بارلاردا گونونو کئچیرنلرین قرار وئرمه یینی اؤزونه ایهانت بیلر. آنجاق، بو قیرمیزی سیمگه نی میللت اوچون اؤنرمه ییبلر، یالنیز میللتچیلر و میللی حرکتچیلر اوچون بیر بویا سیمگه سی کیمی اؤنریبلر و البته بیرلیک اوچون و بیرلشمک اوچون، و میللی اؤله ینلری-اولاناقلاری (تهدیدلری-فرصتلری) و گوجسوزلوکلری-گوجلولوکلری پایلاشماق و شریکلنمک و بیر جبهه ده شووینیسم ایله ساواشماق اوچون اؤنریلیب. ندن سن بو بیرلیگه قارشیسان و بو سیمگه نی قبول ائتمیرسنسه، هانکی یؤنتمی بیرلیک یاراتماق اوچون، و تزاحملاری آرادان قالدیرماق اوچون اؤنریرسن؟ اولمایا، سن ده بئله دوشونورسون کی تزاحمون اولماغی و بیر-بیریمیزه قارشی جبهه توتماغیمیز یاخچی و گرکلیدیر؟! اینسانلاری او آداملار آخماق یئرینه قویورلار کی اؤزلرینی موخالیف یئرینه قویماغا حاقلی گؤروب، باشقالارینی موافق یئرینده گؤرمکدن آجیقلانیرلار. ایندی بو بویا سیمگه سی ایله حرکتین ایچینده بیر سیرا تشکیلاتلار و شخصلر موافق اولوب، اونو بیرلیک سیمگه سی کیمی اؤنریب، و اوندان باشقاسی اولان بیر بیرلیک سیمگه سی اولدوغونا ایناماییبلار. اونلارین بو ایشی میللتی آخماق یئرینه قویماق دئمکدیرسه، سنین بو سیمگه ایلیه مخالفت ائتدیگین نه دیر بس؟! بئلنچی بیر آداملار بیرلیگه قارشی گلیب، مخم-مخم-مخالفم دئییب، اؤزلرینی راضی سالیب، اوتوروب قارما-قاریشیقلارا باخیرلار، و حرکتین هئچ بیر سورونوندن سوروملولوق داشیمیرلار. حرکتین میللی مجلیسی اولسایدی، چوخونلوق سسینه و اونایینا گووهنیب، بیر قرار وئرمک اولاردی، آما، بو مجلیسین اولمادیغی سورجده نه ائتمک اولار؟! اوتوروب هر آغیزدان گلن سؤزه قولاق آسیب، و هر بویوروغا بویون اهیمک گرکیرمی؟! بللی کی بو دورومدا سورونلاریمیزا سورومسوز داورانماق یئرینه، سوروملولوقلا توپلولوقلارا قاتیلماق گرکیر و «عیبی یوخ! قوی بورادا او دئین اولسون! باشقاسین دا دا من دئین اولار!» دئمک گرکیر. البته کی، هر زادا دا عیبی یوخ دئمک اولمور، و آذربایجان میللی منفعتلرینی دوشونمک گرکلیدیر.
مهران:
دئموكراتيك روح و آنلاييشدان يوخسون يؤنته‌م، سيياسي اخلاقا اويمايان داورانيش: بو بايراق آنجاق اولدوغو كيمي يعني آدي گئچه‌ن تشكيلاتلار طرهفيندهن و بو آماجلا اؤنه‌ريله‌ن بير بايراق-سيمگه دييه سونولمالي ايدي. آنجاق بو، ياپيلمادي. وورقولاماقدا يارار گؤروره‌م: منيم قيناديغيم شئي، تورك خالقي و گونئي آزهربايجان`ا ميللي بايراق اؤنه‌رمه اولايينين اؤزو دئييلدير، ترسينه من كسينليكله گونئي آزهربايجان`ا قوزئيده ن فرقلي، قاليجي بير ميللي بايراق ياراديلماسي گره كديييني ساوونورام. منيم قيناديغيم شئي، اؤنه‌ريله‌ن بايراقلارين آنتي دئموكراتيك بيچيمده سونولماسي، اولايي اولدو بيتدييه گتيرمه، يئتگيلي اولماديغي حالدا تورك خالقي و گونئي آزهربايجان يئرينه قرار وئرمه، بونلارا قارشي اولانلاري ايسه قارالاما و ايططيلاعات آدامي گؤسته‌رمه كيمي يؤنته‌مله‌ردير. بو اولاي بير يول داها تورك و گونئي آزهربايجان`ين مئدييا صاحيبله‌ري و سيياسي آكتيويستله‌رينده‌ن بير بؤلومونون اولايلارا نه دنلي گرچه‌كله‌رده‌ن قوپوق، دئموكراتيك روح و آنلاييشدان يوخسون ياناشديقلاريني گؤسته‌ردي.
من:
لوطفاً قانیتسیز ادعا ائتمه یین! کیملر (آدلاری بللی اولاراق) " دئموكراتيك روح و آنلاييشدان يوخسون يؤنته‌م، سيياسي اخلاقا اويمايان داورانيش" ائدیبدیر؟! اونلاری آچیقلایین سونرا محکوم ائتمه یه باشلاییین. اولمایا منیم ده یازیلاریمی " دئموكراتيك روح و آنلاييشدان يوخسون يؤنته‌م، سيياسي اخلاقا اويمايان داورانيش" کیمی تبکی گؤستره جکسینیز؟! بللی کی بو سیمگه نی اؤنرنلرین آماجی بیرلیگین یارانماسیدیر و بللی کی ایسته ییبلر بیرلیک رمزی اولان بیر سیمگهنی یاراتسینلار. بو ایشی گؤرندن سونرا دئمه یه جکلر کی بیز بو سیمگه نی یالنیز اؤزوموز اوچون یارتمیشیق!!! بو سؤزو دئسه لر بیرلیگین معناسی نه دیر؟! البته کی اونلاردا سندن و مندن یاخچی بیلیرلر کی گاموت کیمی تشکیلات و سنین کیمی شخصلر بو سیمگه نی قبول ائتمه یه جکلر و البته اونلاردا بیلر، من ده بیلیرم، و سن ده بیلیرسن کی سن و سنین دوشونجندن اولان تشکیلاتدا هئچ زامان بئلنچی سیمگهلری قبول ائتمه یه جک. سنین یولون و سنین دوشونجندن اولان تشکیلاتین یولو آچیقدیر. آما، بو او آنلامدا دئییل کی هامی سینین کیمی دوشونه جک. بو قیرمیزی بویا سیمگه منیم کیمی دوشوننلرین بیرلیک سیمگه سیدیر، سنین کیمی دوشوننلرین بیرلیک سیمگه سی یالنیز و یالنیز گاموت بایراغی اولا بیلر: یولونوز آچیق اولسون!!!
مهران:
قيرميزي بايراق، دوزگون و دئموكراتيك يوللارلا سونولسا ايدي ده، سياسي و كيمليك آچيلاريندان گينه ده يانليش، جيددييه‌تده‌ن اوزاق و ويزيونسوز بير گيريشيم ايدي. باشدا بونا گؤره كي ميلله‌تله‌شمه‌كده اولان تورك خالقي و دئوله‌تله‌شمه يولوندا يورويه‌ن گونئي آزهربايجان`ين سيمگه‌يه يوخ، بو ميلله‌تله‌شمه و دئوله‌تله‌شمه سوره‌جله‌ريني تمثيل ائده‌بيله‌جه‌ك، آزهربايجان جومهورييه‌تينده‌ن فرقلي اولان قاليجي بير ميللي بايراغا ائحتيياجي واردير.
من:
بو قیرمیزی بویا سیمگه منیم کیمی دوشوننلرین بیرلیک سیمگه سیدیر، سنین کیمی دوشوننلرین بیرلیک سیمگه سی یالنیز و یالنیز گاموت بایراغی اولا بیلر: یولونوز آچیق اولسون!!!
مهران:
ميللي بايراغين اورتايا چيخيشي، گونئي آزهربايجان دئوله‌تينين يارانماسيني يئيينله‌شديره‌ر: من گونئي آزهربايجان و تورك خالقيني تمثيل ائده‌جه‌ك ميللي بايراغين گونئي آزهربايجان دئوله‌تينين قورولماسيندان سونرانين ايشي اولدوغو دوشونجه‌سيني يانليش بولورام. ميللي حاقلارلا ايلگيلي اولان هر شئي، گونئيده ميللي دئوله‌تين قورولماسيندان آسيلي دئييلدير. اؤرنه‌يين توركجه‌نين ايراندا رسمي ديل ائديلمه‌سي، يا دا خالقينين ان آزيندان بله‌دييه‌له‌ر دوزئيينده اؤزونو يؤنه‌تمه قونوسو، ميللي دئوله‌ت يارانمادان دا گرچه‌كله‌شه‌بيله‌جه‌ك شئيله‌ردير. بونون كيمي، گونئيين اؤز ميللي بايراغينا قاووشماسي دا، حؤكمه‌ن دئوله‌ت قورولاندان سونرا گرچه‌كله‌شمه‌لي دئييلدير، اوندان اؤنجه ده الده ائديله‌بيلير. بو دورومدا گله‌جه‌كده قورولاجاق دئوله‌تين ايشي، ساده‌جه داها اؤنجه الده ائديله‌ن ميللي بايراغا (پارلئمان، رئفئراندوم، حؤكومه‌ت يارليغي، ... يؤنته‌مله‌ري ايله) رسمييه‌ت قازانديرماق اولاجاقدير. نئجه كي فيليسطين و فيليسطين خالقي دئوله‌تله‌شمه‌ده‌ن اؤنجه ده اؤز ميللي بايراغيني اورتايا چيخارميشدير. كورد خالقي و كوردوستان`ين بؤلومله‌ري ده عئيني يولو گئتميشله‌ردير. بيز ده ايستيثنا دئييليك و اؤز ميللي بايراغيميزا قاووشماق اوچون ميللي دئوله‌تيميزين قورولماسيني بكله‌مه‌مه‌ليييك. بيزي بونو ياپمايا مجبور قيلان نده‌نله‌رده‌ن بيري، ميللي بايراغين اورتايا چيخيشينين، بيزيم ميللي دئوله‌تيميزين اورتايا چيخيشينا كؤمه ك ائده‌بيله‌جه‌ييدير.
من:
گاموت بایراغی چوخداندیر چیخیبدیر، آما سن دئین اولای هله اوز وئرمهییبدیر. بیز فیلیسطینلیلردن و کوردلردن قاباق اؤز میللی بایراغیمیزا قوووشموشوق (1918دن)، سن و سنین کیمیلر اؤز فیکرلرینده اولسونلار، بیزیم فیکیرلریمیزده یوخ!
مهران:
آزهربايجان رئسپوبليكاسيني بايراغي گونئي آزهربايجان`ين ميللي بايراغي دئييلدير: قيرميزي بايراق-سيمگه‌ني اؤنه‌ره‌نله‌رين آزهربايجان رئسپوبليكاسينين دئوله‌ت بايراغيني بوتون تورك خالقينين بايراغي دييه گؤسته‌رمه‌له‌ري، تكجه اونلارين دوشونجه‌سيدير. اونلار بو اينانجلاريني بئله تقديم ائتمه‌لي و بوتون گونئيليله‌ر آديندان قونوشماقدان ساخينماليديرلار. چونكو هامي بو دوشونجه‌ني پايلاشمير. اؤرنه‌يين من گونئي آزهربايجان و يا بوتؤو آزهربايجان`ين بايراغينين آزهربايجان رئسپوبليكاسي بايراغي اولماسي گره‌كدييينه اينانميرام. منجه گونئيين اؤزونه خاص تاريخي سوره‌جده اؤز ميللي بايراغيني اولوشدورماسي گره‌كير. قوزئي آزه‌ربايجاندا دالقالانان بايراق، بللي بير تاريخي سوره‌جين سونوندا قوزئيليله‌ر طرهفيندهن ياراديلميشدير. او بايراقدا خيريستييان چار روسيياسي سؤمورگه‌سينده‌ن قورتولما و موسه‌لمان عوثمانلي دئوله‌تي و اوردوسونون بو اوغوردا قاتقيسينين يانسيمالاري واردير. بو اوزده‌ن ده قوزئي آزهربايجان`ين ميللي بايراغي، يالنيز آزهربايجان رئسپوبليكاسينين ميللي بايراغيدير، گونئيين دئييلدير. اويسا گونئي آزهربايجان باشقا تاريخي بير سوره‌جده‌ن گئچمه‌كده‌دير. بيز موسه‌لمان فارسيستان سؤمورگه‌سينده‌ن قورتولما ساواشيمي وئرمه‌كده‌ييك و عوثمانلي كيمي ديش كؤمه‌كچيميز ده يوخدور، بيز آزهربايجان رئسپوبليكاسينين يارديميندان بيله يوخسونوق. تورك خالقي و بؤلونموش آزهربايجان`ين بيرلييي قوزئي`ين ميللي و دئوله‌ت بايراغيني گونئي`يه، يا دا گونئي`ين بايراغيني قوزئي`ه تحميل ائتمه‌كله ساغلانماز. بونلارين هر بيري، اؤته‌كينين اؤزونه مخصوص اولان تاريخي سوره‌جله‌رده اولوشدوردوغو ميللي بايراغا سايقي دويماليديرلار.
من:
بیز گونئی آذربایجان دئینده «آذربایجانین گونئییی» قصد ائدیریک و آذربایجان میللتی دئینده، آذربایجان میللتی. آما، سن «آذربایجان دئینده» فارس-روس بؤلمه لرینه اینانیب، اورانی «قوزئی آذربایجان» و بورانی «گونئی آذربایجان» و اورانین میللتینی «قوزئی آذربایجان میللتی» و بورانین میللتینی «گونئی آذربایجان میللتی» و داها دوغروسو «تورک میللتی» آدلاندیریرسینیز. سنی دوشونمک منیم کیمی کؤهنه بئیین آداما چوخ چتیندیر. بیز کؤهنه بیر میللت ایک: نئچه مین ایللیک میللتیک، و سنین کیمیلر کیمی نئچه گونلوک هله یارانمامیش میللتی دوشونه بیلمیریک. چوخ باغیشلایین. بللیدیر کی آذربایجان بایراغی بوتون تورک خالقینین بایراغی دئییل، و یالنیز آذربایجان میللتینین بایراغیدیر. هارادان بئله دوشونورسن کی آذربایجان بایراغینی بوتون تورک خالقینین بایراغی بیلنلر واردیر؟!!! آذربایجانین قوزئیینده اسن بایراغی قوزئیلیلر یوخ، بلکه، آذربایجانلیلار یارادیبلار. او آذربایجانلیلار کی بیزدن تئز اؤزلرینی فاشیسم، راسیسم، شووینیسم، توتالیتریسم، و ایچ استعمار الیندن قورتاریبلار و بیزدن تئز زیروهیه چاتماغی باجاریبلار و آذربایجان بایراغینی بیزدن تئز آذربایجان زیروه سینه تاخیبلار. البته سنلری دوشونمک چوخ چتین دئییل! سنلرین (سیزین) سؤزونوزون ساده اولموشو بئله دیر: "آذربایجان قوزئیینده یاشایانلارا عثمانی یاردیم ائدیب، ائله اونا گؤره ده اونلاری بایراغی او اولوبدور!". سیزین سؤزونوزه اساسلاناراق: "گونئی آذربایجانا آمریکالیلار یاردیم ائتسه لر، بیزیم بایراق اونلار بویوردوغو کیمی اولمالیدیر!" اؤیله می؟!
مهران:
كوسووا-آرناووتلوق اؤرنه‌يينين وئردييي درس: من آزهربايجان رئسپوبليكاسي ميللي بايراغينين گونئي آزهربايجان`ين ميللي بايراغي اولماديغي، اولماماسي گره‌كدييي و اولابيلمه‌يه‌جه‌يينه اينانيرام. بئله بير شئيه بؤلگه‌سه‌ل و اولوسلار آراسي گوج مركه‌زله‌ري ده اولوملو باخماياجاقدير. نئجه كي عئيني گوجله‌ر، كوسووا`نين منيمسه‌دييي و آرناووتلوق بايراغي ايله عئيني اولان اؤز ميللي بايراغيني ده‌ييشديرمه‌يه مجبور ائتديله‌ر. بيليندييي كيمي كوسووا و آرناووتلوق آرناووتلاري بؤلونموش بير خالقديرلار. آرناووت خالقي و تورپاقلارينين بير بؤلومو باغيمسيز آرناووتلوق دئوله‌تي (آلبانيا) و اؤته‌كي بؤلومو صيربيستان`ا (كوسووا) داخيل ايدي. بو دوروم ايران`ا داخيل اولان گونئي آزهربايجان و باغيمسيز اولان قوزئي آزهربايجان`ين دورومونا بنزه‌يير. كوسووا آرناووتلارين سئچديكله‌ري ميللي بايراق ايلك باشدا آرناووتلوق دئوله‌تينين ميللي بايراغي ايله عئيني ايسه ده، سونوندا اونلار اؤز ميللي بايراقلارينين آرناووتلوق دئوله‌تي ميللي بايراغيندان فرقلي اولماسي گره‌كدييي سونوجونا وارديلار، داها دوغروسو بونو قبول ائتمه‌يه مجبور ائديلديله‌ر. بو دا بيزيم دوروما بنزه‌يير.
من:
سیز گئدین گوجلره سیغینین، بیز نئچه مین ایللیک ائلیمیزه، و اولو میلله تیمیزه سیغنیب، ایستکلریمیزه ده چاتاجاغیق. سیز مجبور یاشاماق ایستهییرسینیزسه، بویورون فارس بویوردوغو کیمی یاشایین. اولمایا یئکه اربابلار آختاریرسینیز؟! آذربایجانین اولو میلله تینی گؤر کیملرله توتوشدورورسونوز؟! سن بو میللهتی آییرمایین و ایجازه وئرین بو میللت بیرلشسین و بیر بایراغی اولسون، اونلار آییرسالار اونلاری قارقیش ائده ریک! سن نه یه قارقیش اولاسان آخی آ قارداش؟!
مهران:
قيرميزي بايراق-سيمگه‌ني اؤنه‌ره‌نله‌رين چوخو، گونئي آزهربايجان`ين اؤز ميللي بايراغينا صاحيب اولماسي گره‌كديييني قبول ائتمييه‌نله‌ردير: قيرميزي بايراغي اؤنه‌ره‌نله‌رين اصيل حره‌كه‌ت نوقطه‌سي، گونئي آزهربايجان`ين ميللي بايراغينين آزهربايجان رئسپوبليكاسينين بايراغي اولدوغودور. بو اوزده‌ن ده اونلار گونئيه ميللي بايراق يوخ، گئچيجي بير سيمگه گه‌ركدييينه اينانيرلار. باشقا بير دئييشله گونئيه سيمگه منيمسه‌تمه، اونون ميللي بايراغيني دانماقلا ائش آنلامليدير. اؤنه آتيلان آل بايراغين گئچيجي بير سيمگه اولدوغو و گله‌جه‌كده قيراغا قويولوب و اون يئرينه گونئيده قوزئي آزهربايجان`ين بايراغينين منيمسه‌نه‌جه‌يي، بو بايراغي اؤنه‌ره‌نله‌رين چئشيتلي يازي و سؤيله‌شيله‌رينده ديله گتيريله‌ن بير تثبيتدير. بئله‌جه بو بايراغي اؤنه‌ره‌نله‌ر، گاموح`ون بايراق قونوسوندا ياپديغي يانليشليقلاري تكرارلاماقلا قالماييب، بير نئچه‌سيني اونا آرتيرميشديرلار. گاموح`ون اؤنه‌ردييي و باشلانقيجدا بللي بير قبول دا گؤره‌ن اؤز بايراغيني داها سونرالار تحميل ائتمه‌يه قالخيشماسي، يانليش ايدي. آنجاق گاموح`ون گونئي آزهربايجان اوچون - سيمگه دئييل- ميللي بير بايراق اؤنه‌رمه‌سي چوخ يئرينده بير گيريشم و بو بايراغين دا آزهربايجان رئسپوبليكاسي بايراغيندان فرقلي اولماسي گره‌كدييي گؤروشو، سون دره‌جه دوغرو بير گؤروشدو. يئني آل بايراق-سيمگه‌ني اؤنه‌ره‌نله‌رين چوخو ايسه گونئيه ميللي بير بايراق گره‌كدييني كؤكونده‌ن دانير و آزهربايجان رئسپوبليكاسينين دئوله‌ت بايراغيني گونئي آزهربايجان`ين دا ميللي بايراغي اولدوغونو ساوونورلار. بو گؤروشله‌ر كسينليكله يانليشدير.
من:
سن، من، او، بیز داواسینی سالماغی چوخ یاخچی باجاریرسان! اونون بایراغی! منیم بایراغیم! سیزین بایراغیز! بیزیم بایراغیمیز! سیزین آذربایجان!!! بیزیم آذربایجان!!! روس آذربایجانی!!! فارس آذربایجانی!!! شوروی آذربایجانی!!! ایران آذربایجانی!!! و ...!!! قیرمیزی بویا بیر کئچیجی بویا اولسایدی، سیزین ده سؤزونوز دوز اولا بیلردی. آما، خاطیرلاماق ایسته ییریم کی قیرمیزی بویا آللاهدان بیر ثانیه قیویلجیمیدان دا آز یاش فرقی واردیر. اونون یاشی تانریمیزین یاشیندان ائپسیلون قدر کیچیکدیر! قیرمیزی بویا هئچ زامان کئچیجی بویا اولا بیلمز و آذربایجان اؤزگورلویه چاتاندان سونرادا بیر مقدس بویا و بیر سئویملی بویا کیمی اورکلره بویوروق وئره جکدیر و هر زامان بیزیم ساواش و سئوگی و بیرلیک بویامیز کیمی بایراغیمیزدا اسمه یه داوام وئره جکدیر، نئجه کی 1918دن بایراغیمیزین بیر بویاسی کیمی اسیر! خاطیرلاماق ایسته ییرم کی بایراغیمیزین اوچ بویاسی واردیر: قیرمیز، گؤی، یاشیل!
مهران:
بيرله‌شيك آزهربايجان`ين ميللي بايراغيني، گونئي آزهربايجان دئوله‌تي ايله آزهربايجان رئسپوبليكاسي اورتاقلاشا بليرله‌مه‌ليدير: بئله بير بايراق سئچيله‌جه‌كسه بو اورتاق بايراق، بوتون تورك خالقي و بوتون آزهربايجان`ين قاتيليمي ايله اورتايا چيخماليدير. آيريجا بو سورون، بوگونون سورونو دئييلدير. بيرله‌شيك آزهربايجان`ين اورتاق ميللي بايراغي مساله‌سي گونئي آزهربايجان دئوله‌تي قورولاندان سونرا دوشونوله‌جه‌ك بير قونودور. گونئي آزهربايجان دئوله‌تي يارانديقدان و اوفوقدا آزهربايجان رئسپوبليكاسي ايله بيرله‌شمه ايمكاني گرچه‌كده‌ن دوغدوقدان سونرادير كي اورتاق بايراغين نئجه اولماسي بو ايكي دئوله‌تين يئتگيلي اورقان و شخصييه‌تله‌ري آراسيندا و ايكي توپلومدا تارتيشمايا آچيلماليدير. بو قونونون بوگون تارتيشيلماسي بيله، گرچه‌ك اوستو بير تارتيشمادير. آيريجا بوتون تورك خالقي و بيرله‌شيك آزهربايجان`ين اورتاق ميللي بايراغي، هر ايكي بيريم و توپلومو قاپساياجاق اؤزه‌لليكله‌ري اؤزونده يانسيتماليدير. قوزئي آزهربايجان`ين دئوله‌ت بايراغي ايسه، بو قاپساييجي اؤزه‌لليكده‌ن يوخسوندور.
من:
ندن تارتیشمایا بیر بهله ماراخلیسینیز! بو تورک خالقی نه دئمکدیر؟! تورکیه لیلرده تورک خالقیندان حئساب اولونورلار، سنجه؟! اولمایا «اتحادیه کشورهای فارسزبان» یاراتماق ایسته ین احمدینژاد کیمی، سن ده آذربایجانا اتحادیه خلق تورک یارتماق ایسته ییرسن؟! و آذربایجانی بیر، ایکی، اوچ، و ... پارچالاییب، هره سینه بیر بایراق یارالدیب، سونرا اونلاری متحد ائدیب، اتحادیه یاراداجاقسان؟! سنجه بیر بؤیوک و بوتوو آذربایجانین اولماغی پیسدیر؟! سنجه 8 میلیون یئرینه 16 میلیون بیر میللت یاخچیدیر، یوخسا 24 میلیون، یوخسا 32 میلیون، یوخسا 40 میلیون! ندن، هئچ زاد اولمادان آذربایجانلیلارلا معامله ائله مه یه باشلاییبسان. سنجه اونلارین نئچه اون ایللیک دولتچیلیکلری بیزه یارارلی دئییل؟! سنجه اونلارین نئچه اون ایللیک کولتورل، اقتصادی، اجتماعی، سیاسی، و ... گلیشمه لری بیزه یارارلی دئییل؟! مهران بی! آذربایجانی بؤلمه!!! روس-فارس بؤلدو، سن بؤلمه!
مهران:
ميللي حره‌كه‌تين بايراغا ائحتيياجي يوخدور: من ميللي حره‌كه‌ته اؤزه‌ل بير بايراق گره‌كليلييي دوشونجه‌سيني، جيددييه‌تده‌ن اوزاق و يانليش بولورام. ميللي حره‌كه‌ت دييه بير قوروم، تشكيلات، حوقوقي و يا جوغرافي وارليق يوخدور. وار اولان، گونئي آزهربايجان و تورك ميلله‌تي و اونون ميللي حاقلاريني الده ائتمه اوغروندا چاليشان شخصله‌ر و تشكيلاتلاردير، شو آندا تمثيل ائديلمه‌يه ائحتيياجي اولان دا بونلاردير. گونئيده تورك خالقي طرهفيندهن قالديريلان بايراقلار، ميللي حره‌كه‌ت دئييل، گونئي آزهربايجان و تورك ميلله‌تي بايراغي دييه قالديريلمالي و بونلاري تمثيل ائتمه‌ليدير. گونئي آزه‌ربايجاندا گئده‌ن ميللي حاقلار اوغرونداكي حره‌كه‌ت ايسه، اؤزونو باشقا يول و آراجلارلار گؤسته‌ره‌بيله‌ر و گؤسته‌رمه‌ليدير ده. او جومله‌ده‌ن اوچ گؤي-قيرميزي-ياشيل رنگي اؤز سمبولو اولاراق منيمسه‌مه‌ك و يا "آذربايجان" كلمه‌سيني فارس يازيمي اساسيندا و "ذ" ايله دئييل، تورك ديلينه اويقون اولاراق "ز" ايله و ”آزربايجان" بيچيمينده يازماقلا. ايچينده بولوندوغوموز قوشوللاردا سيمگه، ميللي بايراغي اولمايان گونئي آزهربايجان و تورك خالقي اوچون اولاغان اوستو لوكس ساييلير.
من:
سن میللی حرکتین نئچه دن بیری سن مهران؟! من نئچه دن بیری؟! میللتچیلرین نئچه دن چوخو بیرلیک یارلدیب، واحد بیر جبهه ده ساواشماق اوچون بیر قیرمیزی بویالی سیمگه یارالدیب، حرکت ائدیبلر. سن نئچه دن بیری بو نئچهدن چوخونا ندن قارشی چیخیرسان؟! میللی حرکت دئیه بیر قوروم، تشکیلات، حوقوقی و یا جوغرافی وارلیق یوخدور! مهران بهاری دئیه ده بیر وارلیق یوخدور! بونلار یالنیز آد و سوی آددیلار. میللی حرکت واردیر، مهران بهاری ده واردیر. بیر بیر حرکتین دوغرو آدیدیر و او بیری ده بیرینین تاخما آدیدیر. فقط بو!!! سن اؤزووو «ز» ایله تمثیل ائتمکده اول! آما «واولی تورکلر» اؤزلرینی تمثیل ائتمه یه یالنیز «و»دن یوخ، بلکه بوتون وارلیقلاری ایله تمثیل ائتمه یه جهد گؤستریرلر: تورپاقلاری ایله، بویالاری ایله، پالتارلاری ایله، رقصلریله، دیللریله، و تراختورلاریله!
مهران:
رنگلي دئوريمله‌ر حاكيم ميلله‌تله‌رين دئموكراسي حره‌كه‌تله‌ريدير، محكوم ميلله‌تله‌رين ميللي قورتولوش حره‌كه‌تله‌ري دئييل: فارسلارين ياشيل حره‌كه‌تينين ياشيل سمبولو واردير دييه، بيزيم ده قيرميزي سمبولو منيمسه‌مه‌ميز گره‌كدييي سونوجونا وارماق يانليشدير. ياشيل حره‌كه‌ت، فارس خالقينين ميللي حره‌كه‌تي دئييلدير، داها اؤنجه‌ده‌ن اؤز دئوله‌تينه قاووشموش و ميللي بايراغي اولان، ميللي كيملييي و ميللي دئوله‌تي دونياجا تانينان حاكيم فارس خالقينين دئموكراسي حره‌كه‌تيدير. دولاييسي ايله اونلارين قالديرديغي ياشيل سيمگه بايراق، نه فارس ميللي قورتولوش حره‌كه‌تينين بايراغي، نه فارس ميلله‌تينين، نه فارسيستان`ين و نه ده فارس دئوله‌تينين بايراغي دئييلدير؛ ميللي بايراغي اولان حاكيم بير ميلله‌تين دئموكراسي حره‌كه‌تينين سيمگه‌سيدير. بيزيم ميلله‌تين حره‌كه‌تي ايسه، ميلله‌تله‌شمه‌كده اولان و اؤز ميللي دئوله‌تيني قورماق ايسته‌يه‌ن، وارليغي و ميللي كيملييي دونياجا بيلينمه‌يه‌ن و تانينمايان تورك خالقينين، ميللي قورتولوش حره‌كه‌تيدير؛ دئوله‌تي اولان حاكيم بير ميلله‌تين دئموكراسي موباريزه‌سي دئييلدير. تورك خالقي ميلله‌تله‌شمه‌كده و گونئي آزهربايجان دئوله‌تله‌شمه‌كده‌دير. ميلله‌تله‌شه‌ن و دئوله‌تله‌شه‌نه سيمگه‌ده‌ن چوخ داها اؤنه ملي اولان، اونون ميللي وارليغيني دونيايا تانيدابيله‌ن ميللي بايراقدير. دئوله‌تي اولسا دا اولماسا دا، دئوله تله شمه ده ن اؤنجه ده سونرا دا، تورك ميلله‌تي و گونئي آزهربايجان`ين- اؤزونو تمثيل ائده‌بيله‌جه‌ك ميللي بايراغا ائحتيياجي واردير.
من:
هر قیرمیزی قیرمیزی دئییل! هر قیرمیزی بویا سیمگه سینی ده قوللانان مخملی و بویالی اینقیلابچیسی، دئوریمچیسی دئییل. سن بو سؤزو هارادان چیخاردیرسان کی بیز یاشیللارلا اویغون حرکت ائتمک اوچون قیرمیزینی سئچمیشیک؟! کیم سنه بو سؤزلری دئییرسن و هانکی یازییا اساسلانیرسان؟! بو قیرمیزی بیر میللی حرکتی تمثیل ائتمک اوچون یارانیبدیر، آنجاق او یاشیل بیر اجتماعی-سیاسی حرکتی تمثیل ائتمهیه! یئرده گؤیه دک فرقی نه یه گؤرمورسن، و نه یه ایرانین سییاسی دورومو گؤزلویو ایله هر زادا باخیرسان. میللی حرکتچیلر میللی حرکتی تعریف ائدیرلر و ایجازه وئرمه یه جکلر کی بیزی دوغو-باتی تعریفلرینه سیغیشدیریب آزمایشگاه سیچانی ائتسینلر. بیز گونده اؤزوموزو تعریف و یئنی دن تعریف ائدیریز و دونندن بویونه بیزی تانیماق اوچون بیزیمله یاشاماقلاری گرکیر. سن ده بیزی آرتیق تانیمیرسان و منی اوز-اوزه یوخ، الکترون لوله لریندن گؤروب، منی یالنیز بو یازیلاردان تانییرسان. گل یاخینا منله گول، منله آجیقلان، منله کؤتک یئ، منله توتساقلان، منله تیراختور-تیراختور ائله، منله بابک-بابک ائله، منله «تورک دیلینده مدرسه» دئ و سونرا بیل کی بو قیرمیزی او قیرمیزیلاردان دئییل!!!
مهران:
خرميه و محمره خالق آياقلانمالارينداكي قيرميزي بايراقلار. قيرميزي بايراغي اؤنه‌ره‌نله‌ر، گئچميشده آزهربايجان`دا اؤرنه‌يين بايبه‌ك و باشچيليق ائتدييي "خرميه" حره‌كه‌تينده ده آل بايراقلارين قوللانيلديغيندان يارارلاناراق، اونو منيمسه‌تمه‌يه چاليشيرلار. حتتا بونلاردان بعضيله‌ري، قيرميزي و يا قيزيل رنگين آزهربايجان و تورك خالقين ابه‌دي سمبولو اولدوغونو ايدديعا ائديرلهر. بونلار بوش و اويدوروق ايدديعالاردير. قيرميزي و يا قيزيل رنگلي بايراقلار، قالديريلميش اولسالار بيله، هئچ واخت نه آزهربايجان`ين و نه ده تورك خالقينين سمبولو اولماميش؛ و خرميه حره‌كه‌تي و داها سونرالار بو حره‌كه‌ته قوشولانلارين قالديرديقلاري آل بايراقلار دا، آزهربايجان`ا خاص اولان شئيله‌ر دئييلديرله‌ر. "خرميه" اورتادوغو و اؤزه‌لليكله بوگونكو ايران`ين هر بؤلگه‌سينده جره‌يان ائده‌ن، چوخونون اسكي ايرانيك اينانجلاريندا اولان يئرلي اهالينين ايسلام و عره‌ب حاكيمييه‌تينه قارشي بير ديره‌نيش حره‌كه‌تي ايدي. گله‌جه‌ك يوز ايلله‌رده باشدا غولات (غلات) اولماق اوزه‌ره هئتئرودوكس ايسلام مذهه‌بله‌ريني اولوشدوران خرميه آخيملارينين، تورك خالقي و آزهربايجان`ا اؤزگون اولان اؤنه‌ملي بير اؤزه‌لليكله‌ري يوخدور. خرميه آخيملاري داها سونرالار قيرميزي بايراقلاري قالديرمايا باشلاميشلاردير، آنجاق بو دا بوتون ايران و اورتا دوغودا منيمسه‌نه‌ن گنه‌ل بير اويقولاما ايدي و آزهربايجان`ا اؤزگو دئييلدي (بو اوزده‌ن ده بوندان سونرا بوتون اورتادوغودا "خرميه" حره‌كه‌تله‌ري "محمره" دييه آدلانديريلميشدير).
من:
داها دوغروسو " اسكي ايرانيك اينانجلاريندا اولان يئرلي اهالينين ايسلام و عره‌ب حاكيمييه‌تينه قارشي بير ديره‌نيش حره‌كه‌تي ايدي." دئمه ییوه او قدر شاشیردیم کی یازیم بیته جکدیر! بابکین حرکتینه اسکی ایرانیک اینانجلیلار واریدی!!! بابک یئرلی اهالیله بیرلیکده ایسلام و عرب حاکیمیتینه قارشی دیرهنیردی!!! یوخ بابا!!! بونلاری هارادان چیخارتدین؟! بابکین آدی حسن و قارداشینین و آتاسینین آدی عبدالله ایدی و بیر شیعه مسلمان ایدی و سنی مذهب عباسیلرله ایمامی ریضا کیمی ساواشدا ایدی و عربلرله یوخ، بلکه ظالیم لرله ساواشیردی و ایرانیک اینانجی یوخ، بلکه بیر تورکیک ایناجلی آذربایجان تورکو ایدی و خورمولارین باشچیسی ایدی. پان قارسلارین سؤزلرینه یئنی بیر تریبون آچیلیبدیرمی؟! «حسین فیض الهی وحید»ین سرخ جامگان کیتابینی اوخو، و بیر آز پروفسور ذهتابی کیمی بؤیوکلریمیزین حرکتلرینه دیققت ائت، و قیرمیزی-قیرمیزی دوشون کی سارالمایاسان.
مهران:
قيرميزي رنگلي بايراق، ميللي اؤزه‌لليكله‌رده‌ن يوخسوندور. ميللي سيمگه بير ميلله‌ت و يوردونون اؤزه‌لليكله‌ريني- گنه‌لده دانيلان، اونوتولان و يا وورقولانماق ايسته‌نه‌ن بير اؤزه‌للييي- اؤزونده يانسيتماليدير. نئجه كي فيليسطين خالقي و يوردو اوچون بو گؤره‌وي يئرينه گتيره‌ن، "مسجدالاقصي" سمبولودور. آنجاق قيرميزي بايراقدا تورك خالقي و گونئي آزهربايجان`ين دانيلان و يا اونوتولان ميللي بير اؤزه‌للييي مئوجود دئييلدير. ذاته‌ن ايچه‌ريده تيراختور تاخيمي ماچلاريندا قالديريلان قيرميزي بايراقلار دا، نه تورك خالقي، نه گونئي آزهربايجان و نه ده تورك خالقينين ميللي حاقلاري اوغروندا وئردييي ساواشيمين سمبولو اولاراق قالديريلماميشدير، يالنيز او آياق توپو تاخيمينين رنگي و سمبولو اولاراق قالديريلميشدير. آيريجا ياخين گئچميشده دونيانين فرقلي بؤلگه‌له‌رينده قالديريلان قيرميزي سيمگه، گنه‌لده ميللي يوخ، ترسينه ميلل اولماماغي، اؤرنه‌يين انتئرناسيوناليسمي تمثيل ائتمه‌ك اوچون قالديريلميشدير. دوروم بئله ايكه‌ن، بير سيرا ديشاريدا اولان هؤرگوتله‌ر طرهفيندهن آياق توپو ياريشمالاريندا قالديريلان قيرميزي رنگلي بايراغا ميللي اؤزه‌لليكله‌ر يوكله‌نمه‌سي و داها سونرا دا اونو ميللي حره‌كه‌تين حتتا گونئي آزهربايجان`ين بايراغي دييه سونمالاري جيددييه‌تده‌ن سون دره‌جه اوزاقدير.
من:
سؤزو هر دن داغا هر دن باغا آپارمایاق! میللی اؤزه للیکلردن یوخسون اولسایدی، آخی حرکتین نئچه دن چوخو اونو اونایلاردی؟! یومورتا اول وار ایدی، یوخسا تویوق سورغوسونون نه یاراری اولار کی! میللی حرکت اول وار ایدی، یوخسا قیرمیزی بویا سیمگه سی! بللی کی هر ایکیسی ده وار ایدی. بیزیم میللتین ایچینده قیرمیزی بویا مثبت بیر سیمگه دیر، نئجه کی ساری بویا منفیلیک و ناخوشلوق سیمگه سیدیر. ناصر بی منظورینین یازیلارینی بیر اوخو، و هر زاددا اوستاد کیمی داورانمایی بوراخیب، هر دن تلمذ ائتمه یی، اؤیرنمه یی دن دهنه! آواوا دات بلاگفا! گئدیب اورا باش وور، و قیرمیزی بیزیم میللته نه آنلامدادیر و «ق» حرفینین اؤزللیکلرینی اوخو، و سونرا یئریوی تانی کی منیم کیمی اوشاق سنین کیمی تاخما آدلی آدلیم شخصیتیمیزه توخونمایام! آخی منی ده پیس دوروما قویورسان، هئچ بیلیرسن؟! قارا یاخماقدان ال چک و بو کومونیستلرین و انتئرناسیونالیستلری سیمگه سیدیر دئمکدن واز کئچ. بو بیرلیک سئون قوردلار، قیرمیزی سیمگه نی هئچ زامان آذربایجان بایراغی ائتمه یه جکلر و میلله تی قورخوتمادان و خورتانلیق ائتمه دن واز کئچ.
مهران:
سمبول بايراق چليشگيليدير. من گونئي آزهربايجان و تورك خالقينين عئيني آندا سمبول بايراق (تك رنگلي) و ميللي بايراغا ائحتيياجي اولدوغونو دوشونموره‌م. اساسه‌ن اورتادوغودا ميللي حره‌كه‌تله‌رين تمثيل ائتديكله‌ري ميلله‌تين و وطه‌نله‌رينين آيري آيري بايراق-بايراق و سمبول-بايراقلاري يوخدور. نئجه كي فيليسطين خالقينين، فيليسطينين و فيليسطين ديره‌نيش حره‌كه‌تينين تك بير بايراغي واردير. او دا بايراقدير، سمبول دئييلدير. بيزيم ده بئله گره‌كسيز لوكوسله‌ره ائحتيياجيميز يوخدور.
من:
سنین دوشونجهلرینه سایغی داورانماقدان باشقا یولوموز یوخدور. بایراق اؤز سیمبولدور، و سیمبولدا بایراق اولا بیلر. کلمه لرله اوینامایاق. سن می بللی ائده جکسن لوکوسدور یا لوکوس دئییلدیر؟! سنه لوکوس گلیرسه، چوخلارینا گرگلی و لازیم گؤرونور. بیر بئله چابا سن جه یئرسیزدیر و سنمی بونو دوشونورسن باشقالاری یوخ؟!
مهران:
يرله‌شيك آزهربايجان`ين اورتاق سيمگه‌سي اولاراق اوچ گؤي-قيرميزي-ياشيل رنگلهري: من بوتون آزهربايجان`ي تمثيل ائده‌ن اورتاق سمبولون بليرله‌مه‌سي فيكرينه اولوملو باخيرام. بوگون بيزه هم كيمليك آچيسيندان و هم سيياسي موباريزه تاكتيكله‌ري باخيميندان ان گره‌كلي اولان شئيله‌رين باشيندا، بؤلونموش بير ميلله‌ت و بؤلونموش بير يورد اولدوغوموزو تثبيت ائتمه‌كدير. خالقيميزين بؤلونموشلويونو تثبيت ائديلمه‌ك بيزيم ميللي موباريزه‌ميزين تمه‌ل ايستيراتئژيله‌رينده‌ن اولماليدير. منجه ايكي آزهربايجان`ين بيرليييني وورقولايان ان اويقون سمبول، تك رنگ قيرميزي دئييل، اوچ گؤي، قيرميزي و ياشيل رنگله‌ردير. بو رنگله‌ر، مودئرن چاغدا قورولان ايلك آزهربايجان دئوله‌تينين بايراقلاريندا اولان رنگله‌ردير و بو اوزده‌ن ده آزهربايجان دئوله‌تچيليينين رمزي اولاراق قوللانيلابيله‌ر. نئجه كي بوتون كوردله‌رين منيمسه‌دييي اورتاق سمبول دا بايراق دئييلدير، قورولان ايلك كورد دئوله‌تينين بايراغيندا وار اولان سمبول اوچ رنگدير. بيزيم كورد خالقي ايله هئچ بير فرقيميز يوخدور. كوردوستان دؤرد اؤلكه آراسيندا بؤلونموشسه، آزهربايجان دا بئش اؤلكه آراسيندا بؤلونموشدور، آنجاق چوخوموزون بوندان خبه‌ريميز يوخدور (ايران، آزهربايجان رئسپوبليكاسي، توركييه، گورجوستان، داغيستان.)
من:
بیزیم میللت هئچ زامان بؤلونمه ییبدیر و یوردودا بؤلمک اولماز! آذربایجانین قوزئییی میلیونلار ایلدیر کی گونئییی ایله آرازین ایکی تاییندا یئرلهشیبدیر و هئچ زامان گونئییی قازیب، قالدیریب کنگر کورفزینه یاپیشدیرماییبلار و قوزئییی ده قازیب، قالدیریب خزرین قوزئییی نه آپارماییبلار. یورد اورکده یاشاییر و میللت ده اورکده یاشاییر: میللتی، یوردو بؤلمک اولماز. آذربایجان بؤتووو وارلیقدیر: بیر تورپاق، بیر میللت، و بیر بایراقدیر. او ایش کی ریضاخان ایراندا گؤرنمه دیر و ههله 85 ایلدیر گؤره بیلمیرلر، و مصنوعی «بیر تورپاق، بیر میللت، بیر بایراق» یارادا بیلمیرلر، سن ده همن ایشی گئرچک اولان بیر تورپاق، بیر میللت، و بیر بایراغا گؤره بیلمه ییب، «ایکی تورپاق، ایکی میللت، ایکی بایراق» ائده بیلمه یه جکسن و گئرچکلره اینانماغین و سایقیلی داورانماغین گرکیر.
بیزیم کورد خالقی ایله چوخ فرقیمیز واردیر:
1- بیز بیر میللتیک
2- بیزیم باغیمسیز آذربایجان دؤلتی واریمیزدیر
3- بیزیم اولوسلار آرارسی اؤگوتده اسن بایراغیمیز واردیر
4- بیزیم استاندار آذربایجان تورکجه سی واریمیزدیر
5- بیزیم متشکل و سازمانلاشمیش ارتشیمیز واردیر
6- بیزیم قوردوغوموز میللی مجلیسلریمیز واردیر
7- بیزیم «خیابانی»لر، «رسولزاده»لر، «پیشه وری»لریمیز واردیر
8- بیزیم نئچه مین ایللیک دئولتچیلیک تاریخیمیز واردیر
9- بیزیم شاه اسماعیلیمیز، بابکیمیز، کوراوغلوموز، قوچاق نبیمیز، جوادیمیز، موباریزیمیز، ابراهیمیمیز، ستارخانیمیز، و ... واردیر
10-...
مهران:
يئني سيمگه، يئني بؤلونمه‌له‌ر دئمه‌كدير: قيزيل بايراق بيرله‌شمه مقصه‌دي ايله اؤنه سورولسه ده، پيراتيكده داها چوخ و داها درين بؤلونمه‌له‌ره هم گونئيين ايچينده و هم گونئي-قوزئي آراسيندا يول آچميشدير و آچاجاقدير. بيرينجي بؤلونمه ايستيقلالچيلار (اؤنه‌ريني دسته‌كله‌يه‌نله‌رين چوخو بو جرگه‌يه داخيلدير)، فئدراليستله‌ر و بونلارين ديشيندا قالانلار (اؤز گله‌جه‌ييني بليرله‌مه حاققيني ساوونانلار، .....) آراسيندا قيرميزي بايراق اولايينين تتيكله‌دييي آيريشما، جرگه له شمه و قارشي دورمالاردير. ايكينجي بؤلونمه، گونئي-قوزئي آيريشماسينين درينله‌شمه‌سيدير. اويسا بيزيم ائحتيياجيميز اولان شئي، فرقلي سيياسي آخيملار آراسيندا و ده قوزئي و گونئي آراسيندا دوغرودان بيرلييي وورقولايان، و دولايلي اولاراق بؤلونموشلويو تمثيل ائده‌بيله‌جه‌ك سمبوللاردير. بونو ياپمانين ان ائتگيلي و ان ساده يوللاريندان بيري ده، منجه اوچ ياشيل، قيرميزي و گؤي رنگله‌رين هر ايكي آزهربايجان`ين و سمبول رنگلهري دييه قوللانيلماسيدير (كوردله‌ر ده بنزه‌ر بير يولو منيمسه‌ميشله‌ردير). آنجاق قيرميزي بايراق –سيمگه‌نين منيمسه‌نمه‌سي، بو تاريخي فورصه تي قاچيرماق آنلامينا گلير. بيزيم خالق پارچالانميشدير و اونا بو اوچ رنگده‌ن باشقا بير سمبول سئچديرمه‌ك، اونو داها دا پارچالار و پارچالانميشليغيني قاليجيلاشديرار.
من:
یئنی بیرلیک سیمگهسی، بیرلشمه یین باشلانیشی دئمکدیر! یئنی آیریلیق سیمگه لری آیریلیشین و اختلافین داواملانماسی دئمکدیر. «قارا آی-اولدوزلو» بیزیم ایچ استعمارا معروض قالدیغیمیزی گؤسترن و بوتوو آذربایجانا گئدن یولوموزون بایراغیدیر. آنجاق، قیرمیزی بویا سیمگه سی آذربایجان میللی حرکتینین ایچینده چالیشان استقلالچی (باغیمسیزچی)، فئدیرالچی (ایرانچی) و «بؤتوو آذربایجانچی»لارین بیرلیک سیمگه سیدیر و بو سیمگه ایله آذربایجان میللی حرکتینی تمثیل ائدیریک. «گاموت» بایراغی میللی حرکت استقلالچیلارین بایراغیدیر، میللی حرمکت فئدئرالچیلارین بایراغی ایسه ایران بایراغی ایله بیرلیکده فئدیرال بایراقلاری اولمالیدیر، و میللی حرکت بوتوو آذربایجانچیلارین بایراغی دا «قارا آی-اولدوزلو» بایراقدیر. آنجاق، قیرمیزی بویا سیمگه بو اوچ چئشیتلی حرکتچیلرین بیرلیک سیمگه سیدیر.
مهران:
تاريخي حافيظه قولاي اولوشماز، خالقين تاريخي حافيظه‌سي ايله اويناماماق گره‌كير: گونئي آزهربايجان و تورك خالقينين بايراغينين رنگله‌رينده تاريخي سوره‌كليليك و داوام دا اؤنه‌مليدير. گؤي قيرميزي ياشيل رنگلهري، ايندييه ده‌ك گونئي اوچون اؤنه‌ريله‌ن بير چوخ بايراقدا، بايراقلارين طرحله‌رينده- بو طرحله‌ر فرقلي اولسا بيله- مئوجوددور. بو اوچ رنگي تورك خالقينين بيرليك سمبولو دييه، گونئي آزهربايجان شهه‌رله‌ري ديشيندا، تورك خالقينين ايران`ين گونئينده ياشايان بؤلومونده بيله قوللانانلار اولموشدور. اولوشان بو ده‌يه‌رلي تاريخي حافيظه‌ني ده‌ييشديرمه‌ك گره‌كسيز و سيياسي اولاراق سون دره‌جه هزينه‌ليدير. قوزئي و گونئيين بيرليينيني وورقولامانين زاماني اينديدير، بليرسيز گله‌جه‌كده دئييلدير.
من:
اوینامایین مهران بی! قیرمیزی بویانی «گونئی آذربایجان بایراغی» بیلنلر ده اویناماسین! قیرمیزی بویانی «گونئی آذربایجان میللی حرکتینین بایراغی» بیلنلر ده اویناماسین! لوطفاً اوینامایین میللتیمیزن تاریخی حافیظه سی ایله! آذربایجان بیر روحدور گونئی و قوزئی بدنلرینده، و بیر قاندیر گونئی و قوزئی قارداش-باجیسیندا، بونلار هئچ زامان بؤلونمه ییب، بؤلونمه یه جکلر. آنجاق، آذربایجانین قوزئییی شووینیسم ویروسلاریندان قورتولوبدور، و گونئی ده تئز-گئج بو ویروسلاردان قورتولاجاقدیر. بیز دئین یوخ، تانری دئین اولسون!
Keine Kommentare:
Kommentar veröffentlichen